30 Tetor, 2024

Shënim: Për shkak se ka kaq shumë variante dhe lloje të ndryshme të astrologjisë, ky artikull ka të bëjë vetëm me anën kreative që ka secili person sipas shenjës së tij të horoskopit.

Kur japim gjykimin, biem në rrugë pa krye, por kur analizojmë diçka me një mendje të hapur, eksplorojmë një koncept të ri, me të cilin jo domosdoshmërisht të gjithë duhet të pajtohen.

Në mënyrë që të “kapërcejmë” gjithçka që dini deri më sot për figurat e ndryshme të skenës politike, të paktën për ata që gjithmonë janë komentuar e u janë vënë epitete, sot do të ofrojmë krahasime metaforike bazuar në shenja astrologjike.

Ata që e pëlqejnë astrologjinë, apo ata që e duan vetëm për ta lexuar, por jo për ta marrë si të mirëqenë, do të duan të dinë se çfarë i identifikon disa prej deputetëve sipas horoskopit.

Para se t’i lexoni si përshkrime të personalizuara, Lëvizja Vetëvendosje ka shumicën e deputetëve me shenja të elementeve zjarr dhe ajër (kreativ në aksione?), PDK ka shumicën me shenja të elementeve ujë dhe tokë (të qetë, por të rëndë me fjalë), ndërsa LDK ka një përzierje mes tokës dhe zjarrit (ka brenda pak PDK dhe LVV).

Patjetër që kësaj liste do t’i prijë Adriana Matoshi, një Ujor i viteve ‘80.

E lindur më 5 shkurt 1980, Adriana e Kuvendit nga radhët e Lëvizjes Vetëvendosje sigurisht që ka sjellë “aktrimin” edhe në parlament. Ajo përfaqëson saktësisht karakteristikën e Ujorëve: bën për vete njerëzit me veprimet e saj, nuk i intereson reagimi i të tjerëve, nuk kërkon vëmendje, por e merr atë. Paraqitja e saj me bluzën me mbishkrimin “Kush ka humb si dinari, kush?” tregon zgjuarsinë e një Ujori për të kapur momentin. Përndryshe, pse bluza do të kishte ngjyrën e kuqe, nëse jo për të marrë vëmendje? Apo, ndoshta fonti po duket më mirë në të kuqe?

Ganimete Musliu, një “peshk i zëshëm”. Ndoshta as zonja Musliu nuk e di që i takon kësaj shenje, sepse fokusi i saj qëndron në fjalët që patjetër duhet t’i thotë në seancat parlamentare, dhe koha e saj është e kufizuar për t’u marrë me astrologji. Duke qenë në opozitë, si deputete nga radhët e Partisë Demokratike të Kosovës, fjalët e saj duhet të jenë: plumbi i tyre i vetëm. Një shenjë e ujit gjithmonë ka fjalët më të forta se veprat. “Albin, s’don me lënë asnjë qershi pa e ngrënë,” kush e njeh “tripin e qershive” e di që Ganimetes i është dashur një anë filozofike-komike për të thënë atë që ka pasur synim. Si e shihni ju Ganen, si një sirenë apo peshk i artë?

Vlora Dumoshi, shigjetarja e LDK-së, përndryshe bart emrin simbol dhe datën e pavarësisë së Shqipërisë. Ajo është krijuesja artistike e LDK-së, është shpirti që dikur drejtoi Ministrinë e Kulturës. Nëse astrologjia shfaq anën metaforike me trashëgiminë gjenetike, Dumoshi ka pasur nga kush ta marrë zgjuarsinë dhe zotësinë e saj, të cilat i kombinon me prezantim të mirë dhe qëndrim stoik. Me finesën e saj ajo nuk “gjuan” me vezë deputetët e qeverisë Kurti, por ua dhuron një vezë në duar për të treguar se nuk është si ata. E zgjuar – fjalë pak!