19 Shkurt, 2026

Një ekspozitë e re në Victoria and Albert Museum në Londër rikthen në qendër të vëmendjes momentin kur lindi YouTube, më shumë se dy dekada më parë një çast që ndryshoi përgjithmonë mënyrën si konsumojmë dhe krijojmë përmbajtje online.

Muzeu ka përvetësuar një rikonstruksion të faqes së hershme të platformës, bashkë me videon e parë të ngarkuar ndonjëherë nga bashkëthemeluesi Jawed Karim. Bëhet fjalë për klipin ikonik “Me at the zoo”, ku 25-vjeçari i asaj kohe shfaqet në San Diego Zoo duke folur për elefantët.

Videoja 19-sekondëshe, e publikuar më 23 prill 2005, është parë mbi 382 milionë herë dhe ka grumbulluar më shumë se 18 milionë pëlqime një dëshmi e fuqisë së një momenti të thjeshtë që u kthye në simbol të epokës digjitale.

“Gjëja interesante për këta elefantë është se kanë feçka shumë, shumë, shumë të gjata”, dëgjohet të thotë Karim në klipin që sot konsiderohet një pikënisje historike e kulturës së videove online.

Drejtori ekzekutiv i YouTube, Neal Mohan, theksoi se vendosja e kësaj videoje në muze nuk është thjesht ekspozim i një materiali arkivor, por një ftesë për të reflektuar mbi lindjen e një fenomeni global kulturor.

Sot, YouTube mbetet një nga platformat më të rëndësishme për artin dhe kulturën, ku përmbajtjet nga muze dhe galeri shpesh arrijnë shikueshmëri që rivalizon, madje tejkalon, shërbimet tradicionale të transmetimit. Nga një video e thjeshtë në kopsht zoologjik, në një arkiv gjigant të memories kolektive historia e YouTube tashmë është pjesë e historisë së muzeve.