19 Shkurt, 2025

Shkruan: Erletë Rrustemi

 

Kumti i editorëve: Ky artikull është shënuar për t’iu treguar gjendjen tonë emocionale, shpirtërore, politike, financiare, kulturore dhe motoristike bazuar në ngjarjet e vërteta të ditës së djeshme dhe domethënien e tyre për ne! Artikujt janë ditorë dhe bëhen një me ty kur ndajmë përditshmërinë e njëjtë në Kosovën tonë. Paper ndanë me ty!

Lexues, mos prit për anije në një aeroport!
Është në rregull të pritësh, por duhet ta presësh në vendin e duhur. Mos harro, nganjëherë pritja është rezultat i asaj që krijojmë në mendjen tonë, e cila jo gjithmonë është ashtu siç duket.

***

Çfarë ndodhi dje në Kosovë?
Me votat e numëruara deri tani, janë publikuar listat e kandidatëve të partive politike që potencialisht kanë siguruar ulëse në Kuvend.

Në mesin e personave që kanë qenë pjesë e disa legjislaturave dhe atyre që për herë të parë do t’i bashkohen Kuvendit, kalimi i disa kandidatëve me vota, në raport me ata më të vjetër, ka ngritur polemika krahasimi të tipit: “Kush, kur ia ka dëgjuar zërin këtij?”

“Mulliri ka nevojë për mullixhinj.” Asnjë arritje nuk është e rastësishme; elektorati votoi atë që ua shkeli derën tash e tre muaj – nga para fushatës zgjedhore deri në ditën e votimit.

Fitorja e Edona Llalloshit nga VV-ja, fitorja e Sala Jasharit dhe Përparim Grudës nga PDK-ja, hyrja potenciale e Paris Gurit nga LDK-ja (varësisht nga numri që mund të ndryshojë), si dhe ajo e Jehona Lushtaku-Sadriut, janë rezultat i synimit të qartë dhe të drejtpërdrejtë për fitore.

***

Në 17-vjetorin e pavarësisë, presidentja Vjosa Osmani ka dekoruar një numër personalitetesh dhe institucionesh. Me urdhrin “Hero i Kosovës” është dekoruar post-mortem edhe Shaban Jashari, i cili gjatë rezistencës së armatosur në mars të vitit 1998 ra në shtëpinë e tij së bashku me 21 anëtarë të familjes, përfshirë komandantin legjendar Adem Jashari.

***

Zëvendëskryeministri në detyrë, Besnik Bislimi, ka deklaruar se siguria e Kosovës është kërcënuar gjatë fushatës zgjedhore nëpërmjet lajmeve të rreme dhe, madje, edhe në ditën e votimit, përmes një sulmi kibernetik ndaj uebfaqes së Komisionit Qendror të Zgjedhjeve (KQZ).

Gjatë qëndrimit në Varshavë të Polonisë, ku mori pjesë në takimin informal ministerial të organizuar nga Presidenca e Polonisë në Këshillin e Bashkimit Evropian (BE), Bislimi theksoi se duhet gjetur përgjigje ndaj kërcënimeve të tilla, me të cilat përballen të gjitha vendet e bllokut.

***

Kosova nuk ia ka dalë që, as një çerekshekull pas luftës, t’i dokumentojë sistematikisht krimet e kryera nga regjimi serb gjatë luftës së fundit. Padia ndaj Serbisë për krime gjatë luftës nuk është ende në horizont, për shkak se shteti më i ri në Evropë ende nuk gëzon të drejta për të ndërmarrë një hap të tillë.

Mungesa e dëshmive në dokumentet zyrtare serbe për spastrim etnik në Kosovë, shkatërrimi i trashëgimisë kulturore dhe përgatitja juridike e vendit për një padi kundër Serbisë ishin temat që u trajtuan në ditën e parë të punimeve të konferencës shkencore “Shkalla, trashëgimia, dokumentimi dhe gjykimi i krimeve të kryera në Kosovë”.

***

Çfarëdo qoftë puna jote, bëje mirë! Jo për punëdhënësin, por për veten tënde. Ti e bën punën, jo puna ty. Ti nuk je puna që bën – ti je personi që je, për virtytet e tua njerëzore. Gabimi që ke bërë para disa ditësh në punë nuk të definon si person.