March 20, 2024

Është thjesht madhështore në çdo stinë. Banorët e përshkruajnë si “vendstrehim për çdo zog”, pasi ky vend ofron nga një kënd për të gjithë.

Po flasim për Londrën e bukur, e cila aq sa është e lashtë në kulturë, po aq është edhe magjepsëse.

Ajo posedon pjesë të mbushura me gjelbërim, ndoshta edhe për shkak të motit që e karakterizon. Londra posedon shumë më shumë ditë me shi, sesa nga ato me diell.

Meqenëse ju mund të rastisni në vizitë kur janë pikërisht këto ditë me shi, ne ju propozojmë për vizitë disa ambiente të mbyllura, që i karakterizon arkitektura e bukur, lashtësia dhe historia.

British Museum

Projektuar nga arkitekti Sir Robert Smirke në vitet 1800, Muzeu Britanik është një shembull i arkitekturës neoklasike – veçanërisht stili i ringjalljes së arkitekturës greke, i modeluar sipas tempullit të Athena Polias në Priene, duke përdorur gurin Portland dhe 44 kolonat e rendit jonik (IONIC ORDER).

Ai është muzeu i parë publik kombëtar në botë.

Muzeu Britanik është unik në bashkimin e kulturave të botës brenda një çatie, që përfshin kontinente dhe oqeane. Asnjë muze tjetër nuk është përgjegjës për koleksionet me të njëjtën thellësi dhe gjerësi, bukuri dhe rëndësi.

Koleksionet e tij, të cilat numërojnë më shumë se shtatë milionë objekte, ilustrojnë dhe dokumentojnë historinë e kulturës njerëzore që nga fillimet e saj deri në ditët e sotme.

Në qendër të Muzeut Britanik ndodhet sheshi më i madh publik në Evropë – Gjykata e Madhe e Mbretëreshës Elizabeth II.

E projektuar nga Foster dhe Partners, Gjykata e Madhe është një hapësirë prej dy hektarësh, e mbyllur nga një çati spektakolare prej xhami me dhomën e leximit në mes.

Në vitin 1999, kjo pjesë e njohur si Gjykata e Madhe u ridizajnua së bashku me Oborrin e Madh, gjë që lejoi të dalin në pah hapësirat e fshehura. Me këtë rast ndryshoi edhe pjesa e xhamit në çatinë e cila përmbahet nga 3212 xhama, asnjë prej të cilëve nuk janë të njëjtë.

Pas përfundimit, ridizajnimi e rriti Muzeun për 40 për qind. Për herë të parë në më shumë se 150 vjet, Oborri i ri i Madh prej dy hektarësh u dha vizitorëve mundësinë për të lëvizur lirshëm nëpër katin kryesor të Muzeut. Që nga rihapja 113 milionë njerëz kanë ecur nën çatinë e xhamit.

Kurse gjatë vizitës, ju mund të shihni depon e skulpturave egjiptiane, qendrën Ford, objektet arsimore, teatrot, objektet e vizitorëve që përfshijnë restaurante, ekspozita dhe ngjarje.

Objekti nga jashtë të dhuron ndjesinë se gjendesh në Greqi, nga para posedon një oborr gjigant të cilën vizitorët e përdorin për të qëndruar, kurse nga lart ke ndjesinë se je mbi një pishinë, shkaku i pjesës së xhamit i cili e reflekton qiellin.

Old shops

Një nga kënaqësitë për të shpenzuar në Londër, është të kalosh në rrugicat ku gjenden dyqanet e vjetra, ku shumica e tyre gjenden në pjesën perëndimore të qytetit. Dyqanet në përmbajtje janë: dyqane kapelash, çizmesh, dyqane librash, fustanesh, vazosh, dyqane të verës dhe të kostumeve vetëm për meshkuj.

Të gjitha dyqanet e vjetra janë të vendosura tek arkitektura vendase në Londër, të cilat janë ndërtuar nga vitet 1580, disa prej tyre i kanë qëndruar kohës ndërsa disa janë renovuar. Renditja e tyre në rrugë dhe shumëllojshmëria e ngjyrave të dyqaneve të lejon të mos shpenzosh shumë kohë rrugëve, pasi që të gjitha ndodhen në një vend.

Jermyn Street, është pjesa më e bukur e qytetit, ku mund të gjesh dyqane të vjetra si dhe të vizitosh Paxton dhe Whitfield. Dyqanet e djathit, verës dhe biskotave, të cilat nuk gjenden në marketet e mëdha, mund t’i gjeni në këtë rrugë.

National Gallery

Sigurisht që vizitat në qytetet e mëdha duhet t’i shfrytëzoni për të parë gjërat që janë falas. Galeria Kombëtare është njëra prej tyre. Galeria strehon një nga koleksionet më të mëdha të pikturave në botë, përfshirë rreth 2 mijë sosh.

Për të parë gjithçka brenda saj, unë rekomandoj një ose dy vizita nga rreth dy orë për secilën, nëse nuk e keni vizituar kurrë më parë Galerinë Kombëtare. Do të duheshin 8 orë ose më shumë për të hedhur sytë në çdo vepër arti në muze, e cila mund të bëhet e mërzitshme për shumë kohë.

Por, çfarë ka aq të veçantë për të vizituar në Galerinë Kombëtare?

Galeria ka koleksionin më gjithëpërfshirës të pikturave të Rilindjes italiane jashtë Italisë, me vepra nga shumica e mjeshtërve më të mëdhenj fiorentinë dhe venecianë të asaj periudhe, si Leonardo Da Vinci, Botticelli, Rubens, Velazquez, Vermeer etj.

Aty gjenden gjithashtu vepra mbresëlënëse të piktorëve të ndryshëm britanikë, holandezë, francezë, spanjollë dhe flamandë nga shekulli i 15-të deri në shekullin e 19-të.